ខេត្តមណ្ឌលគិរី៖  ប្រជាសហគមន៍ជនជាតិដើមបាននិយាយនៅថ្ងៃទី៧ខែកក្កដាឆ្នាំ២០១៦ថាដីសហគមន៍ភូមិពូរ៉ាដែលមានទំហំប្រមាណជិត ៣០ ហិចតា លើទំហំដីរបស់សហគមន៍សរុប ១៣២៣ ហិចតា ត្រូវបានឈ្នួញធ្វើការឈួសឆាយដោយសំអាងថាមានឯកសារត្រឹមត្រូវ(ប្លង់រឹង) ។

យោងតាមបុគ្គលិកអង្គការអាដហុកប្រចាំខេត្តបណ្ឌលគីរីលោកអ៊ាងម៉េងលីបាននិយាយថាករណីនេះធ្វើឲ្យសហគមន៍ប្រមាណជិត៦០នាក់នាំគ្នាតវ៉ានៅសាលាឃុំស្រែអំពូម ស្រុកពេជ្រាដា ខេត្តមណ្ឌលគិរី ដើម្បីឲ្យអាជ្ញាធរឃុំជួយដោះស្រាយក្រោយការឃ្លាំមើលនិងស៊ើបអង្កេតពីអង្គការអាដហុកប្រចាំខេត្តមណ្ឌលគីរី និងមានការចួលរួមពីមន្រ្តីជំនាញរដ្ឋបាលព្រៃឈើចំនួន២ រូប រួមទាំងអង្គការរីកួស ថែមទៀតផង។

បុគ្គលិកអង្គការអាដហុកបានលើកឡើងថាករណីតវ៉ានេះបន្ទាប់ពីលោក លេង គឹមហ៊ាង ជាភាគីអ្នកទិញបានដាក់គ្រឿងចក្រ១គ្រឿងឈួសឆាយដីព្រៃដែលសហគមន៍អះអាងថាចូលចំកណ្តាលផ្ទៃដីរបស់សហគមន៍តែម្តង ដែលភាគីសហគមន៍មានផែនទីកំណត់ព្រំប្រទល់ត្រឹមត្រូវពីក្រសួងកសិកម្ម រួចមានបោះបង្គោលចំណាំព្រំច្បាស់លាស់ដែលកន្លែងណាជាដីរបស់សហគមន៍ ដីណាមិនមែនជារបស់សហគមន៍។

 ក្នុងកិច្ចជំនួបនោះគឺភាគីអ្នកទិញបានលើកឡើងថា ដីដែលពួកគាត់ឈួសឆាយនោះគឺមាន ឯកសារត្រឹមត្រូវគឺប្លង់រឹង ចំនួន ៣ ច្បាប់(សរុបជាង ១១ ហិចតា) ហើយករណីដែលខាងបងប្អូនលើកឡើងថា ប៉ះពាល់ដីរបស់សហគមន៍នោះ ខាងលោកមានតែប្រគល់ជូនពួកគាត់វិញ បើសិនជាប៉ះពាល់ ឬឈួសឆាយចួលពិតប្រាកដមែននោះ។

ចំពោះរឿងនេះខាងអាជ្ញាធរឃុំលើកឡើងថ ខាងអាជ្ញាធរក៏ពុំទាន់ដឹងច្បាស់ថា ការឈួសឆាយដីនេះវាធ្វើឲ្យចូលដីសហគមន៍ឬយ៉ាងណានោះទេ?។មានតែអាជ្ញាធរជំនាញចុះទៅពិនិត្យជាក់ស្តែង រួចធ្វើការវាស់វែងទើបដឹង ចំណែកខាងអាជ្ញាធរឃុំបើសិនរឿងនេះហួសដែនសមត្ថកិច្ចពុំអាចដោះស្រាយបានមានតែធ្វើរបាយការណ៍ជូនស្រុកជាអ្នកដោះស្រាយបន្ត។ ក្រោយពីកិច្ចប្រជុំមួយព្រឹកគឺខាងបងប្អូនបានឯកភាពគ្នាចុះទៅពិនិត្យជាក់ស្តែង រួមទាំងអាជ្ញាធរឃុំ មន្រ្តីជំនាញ អង្គការអាដហុក អង្គការរីកូស មេប៉ុស្តិ៍ អ្នកសារព័ត៌មានផងដែរ។ ចុងបញ្ចប់នៃការចុះពិនិត្យដីដែលបានឈួសឆាយឃើញថាបងប្អូនពុំសុខចិត្តនោះទេ គឺពួកគាត់និងបន្តតវ៉ា បើសិនជាអាជ្ញាធរមិនអាចដោះស្រាយឲ្យបាន ហើយភាគីឈួសឆាយត្រូវប្រគល់ដីឲ្យសហគមន៍វិញ រួចដាំដើមឈើ និងធ្វើការសងសំណងដល់សហគមន៍ដើម្បីធ្វើការលះលៀងតាមប្រពៃណីជនជាតិដើមភាគតិច៕

• ជនជាតិដើម
• សហគមន៍