រាជធានីភ្នំពេញ៖ ស្នូរអាវុធចំនួន៥គ្រាប់បានបន្លឺឡើងទាំងកណ្តាលអាធ្រាត្របណ្តាលអោយបុរស២នាក់ក្នុងនោះម្នាក់ជាមន្រ្តីយោធាបានរងរបួសធ្ងន់ធ្ងរដោយសារខ្មាន់កាំភ្លើងមិនស្គាល់អត្តសញ្ញាណ២នាក់ជិះម៉ូតូដេញតាមបាញ់ប្រហារនៅចំណុចភូមិបាយ៉ាបសង្កាត់ភ្នំពេញថ្មីខណ្ឌសែនសុខកាលពីវេលាម៉ោង១២នឹង១០នាទីឈាងចូលថ្ងៃទី២ខែកញ្ញា ឆ្នាំ២០១៦

ជនរងគ្រោះម្នាក់ឈ្មោះលី សុងហេង ហៅជ័យ ភេទប្រុស អាយុ៥២ឆ្នាំ មុខរបរជាមន្ត្រីយោធាអង្គភាពង៧០ ស្នាក់ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ( ត្រូវចំនួនបួនគ្រាប់ ១. ប្រអប់ដៃឆ្វេងដាច់ម្រាមមួយ ២.ចំកញ្ចឹងករផ្នែកខាងក្រោយ ៣.ចំដើមទ្រូង ៤.ចំភ្លៅខាងឆ្វេង ចំណែកម្នាក់ទៀតជាអ្នកឌុបឈ្មោះស៊ីន សារ៉េន ភេទប្រុស អាយុ៣២ឆ្នាំ មុខរបរសន្តិសុខហាងពីរ៉ាមីត នឹងរត់ម៉ូតូឌុប ស្នាក់នៅភូមិទំនុប សង្កាត់ភ្នំពេញថ្មី ខណ្ឌសែនសុខ ( ត្រូវចំនួនមួយគ្រាប់ចំស្មារខាងស្តាំ) ។

សូមបញ្ជាក់ថានៅមុនពេលមានហេតុការណ៍កើតឡើងជនរងគ្រោះឈ្មោះលី សុងហេងបានចេញពីញាំអីនៅហាងពីរ៉ាមីត ហើយក៏ហៅម៉ូតូឌុបឈ្មោះស៊ីនសារ៉េនគោលបំនងត្រឡប់ទៅផ្ទះលុះមកចំនុចកើតហេតុស្រាប់តែមានជនសង្ស័យមិនស្គាល់អត្តសញាណ២នាក់ជិះម៉ូតូមួយគ្រឿងមិនចាំម៉ាកបានជិះមកក្បែរហើយដកកាំភ្លើងម៉ាក់ឡុកចិនបាញ់ចំនួនប្រាំគ្រាប់មកលើជនរងគ្រោះទាំង២ហើយក៏ជិះគេចខ្លួនបាត់ស្រមោលតែម្តងទៅ ។

ក្រោយពេលកើតហេតុនគរបាលមូលដ្ឋានរួមជាមួយកម្លាំងកងរាជអាវុធហត្ថបានចុះអន្តរាគមន៍ដល់កន្លែងកើតហេតុប៉ុន្តែបានត្រឹមតែរើសសម្បកកាំទុះចំនួន៥គ្រាប់ដែលខ្មាន់កាំភ្លើងបន្សល់ទុកប៉ុណ្ណោះ។បច្ចុប្បន្នជនរងគ្រោះឈ្មោះលី សុហេង ដែលខ្មាន់កាំភ្លើងបាញ់ចំ៤គ្រាប់ កំពុងស្ថិតក្នុងការសង្គ្រោះបន្ទាន់នៅមន្ទីរពេទ្យកាល់ម៉ែត្រដោយឡែកម្នាក់ទៀតសម្រាកព្យាបាលនៅមន្ទីរពេទ្យបង្អែកសែនសុខ ។

ពាក់ព័ន្ធនឹងករណីនេះសមត្ថកិច្ចសន្និដ្ឋានជាជំហានដំបូងថា អាចជាករណីគំនុំច្រើនភាគរយព្រោះខ្មាន់កាំភ្លើងព្យាយាមបាញ់ជនរងគ្រោះរហូតទៅដល់៥គ្រាប់ឯណោះព្រោះខ្លាចនៅមានជីវិត ៕                                                                      

• បាញ់ប្រហារ
• សង្ស័យ
• រឿងគំនុំ
• រងរបួសធ្ងន់