ខេត្តបាត់ដំបង៖ កុមារីដ៏តូចម្នាក់បានស្លាប់ភ្លាមៗនៅនឹងកន្លែងកើតហេតុនៅក្នុងចំណោមអ្នករបួសចំនួន៧នាក់ បន្ទាប់ពីពួកគេបានចេញពីសុីការហើយបានបើកបរក្នុងល្បឿនយ៉ាងលឿនខ្វះការប្រុងប្រយ័ត្ន បណ្តាលអោយជ្រុលចង្កូតធ្លាក់ចេញពីផ្លូវក្រឡាប់ធ្លាក់វាលស្រែតែម្តង ។

លោក ឌឿន សម្បត្តិ  អធិការរងនៃអធិការដ្ឋាន  នគរបាលស្រុកមោងឫស្សីបានបញ្ជាក់ថា  ករណីគ្រោះថ្នាក់ចរាចរណ៍នេះបានកើតឡើងនៅវេលាម៉ោង៥ និង១៨ នាទី ល្ងាចថ្ងៃទី២៣ ខែមេសា  ឆ្នាំ២០១៧  តាមបណ្តោយផ្លូវជាតិលេខ៥ ត្រង់ចំណុចស្ពានស្នោ ស្ថិតក្នុងភូមិពោធិ២  ឃុំគារ  ស្រុកមោងឫស្សី  ខេត្តបាត់ដំបង ។

លោកអធិការរងបានបន្តថា ករណីនេះដែរគឺបង្កឡើងដោយរថយន្តម៉ាកតាកូមាពណ៌សពាក់ស្លាកលេខ ភ្នំពេញ ២AE-៤២៤៩  ដោយបើកបរក្នុងទិសដៅពីកើតទៅលិចក្នុងល្បឿនយ៉ាងលឿន  ដែលគេបានសន្និដ្ឋានថា  អ្នកបើកបរអាចមានផ្ទុកនូវសារធាតុស្រវឹងព្រោះបើតាមការស្រាវជ្រាវគឺរថយន្តនេះសុទ្ធសឹងជាអ្នកមកពីស្រុកកំរៀង ដែលឡើងមកការបងប្អូននៅចំណុចភូមិរាមគន់  ឃុំគា  ស្រុកមោងឫស្សី ។

នៅក្នុងករណីនេះ គឺនៅពេលដែលរថយន្តមកដល់ត្រង់ចំណុចកើតហេតុ អ្នកបើកបរមិនអាចគ្រប់គ្រងសតិខ្លួនឯងបានទើបបណ្តាលអោយរថយន្តធ្លាក់ចេញពីផ្លូវក្រឡាប់ទៅក្នុងវាលស្រែ  ព្រមទាំងបានបង្កអោយមានក្មេងស្រីម្នាក់ស្លាប់និងមនុស្សដទៃទៀតរងរបួសធ្ងន់ស្រាលសរុប៧នាក់។ក្មេងស្រីរងគ្រោះដែលស្លាប់នោះមានឈ្មោះ ទុំ ស្រីរ័ត្ន អាយុ ៦ ឆ្នាំ រស់នៅភូមិកំប្រង់  ឃុំតាក្រី  ស្រុកកំរៀង  រីឯអ្នកដែលរងរបួសធ្ងន់ ស្រាល មានឈ្មោះ ហួត  ឡាយ ភេទប្រុស អាយុ២៤ឆ្នាំ  ឈ្មោះ កែវ  ឈុនលី  ភេទប្រុស អាយុ៤៩ឆ្នាំ មុខរបរយោធា   ឈ្មោះ ឡុង ចាន់រស្មី  ភេទប្រុស  អាយុ២៤ឆ្នាំ  ឈ្មោះ រស់  សារ៉ុម ភេទស្រី អាយុ៤២ឆ្នាំឈ្មោះ គូ  ផល្លី  ភេទស្រី  អាយុ៤៥ឆ្នាំ  ឈ្មោះ ងិន សារ៉ន ភេទប្រុស  អាយុ៤៥ឆ្នាំ  ឈ្មោះ រ័ត្ន លក្ខណា ភេទស្រី  អាយុ១៨ឆ្នាំ  អ្នកទាំងអស់គ្នារស់នៅភូមិកំប្រ៉ង់ ឃុំតាក្រី ស្រុកកំរៀង ខេត្តបាត់ដំបង។ ភ្លាមៗនោះដែរក្រោយពេលកើតហេតុអ្នកបើកបរដែលមានផ្ទុកនូវសារធាតុស្រវឹងហើយជាអ្នកបង្កអោយរថយន្តក្រឡាប់ជាច្រើនត្រឡប់នោះបានរត់គេចខ្លួនបាត់ស្រមោល

ដោយបច្ចុប្បន្ន សពត្រូវបានក្រុមគ្រួសារនាំយកទៅធ្វើបុណ្យតាមប្រពៃណីរីឯអ្នករងរបួសទាំង៧នាក់ត្រូវបានបញ្ជូនទៅព្យាបាលនៅមន្ទីរពេទ្យបង្អែកស្រុកមោងឫស្សីហើយដែរ  ដោយឡែករថយន្តត្រូវបានប៉ូលីសយកមករក្សាទុកនៅអធិការដ្ឋាននគរបាលស្រុកមោងឫស្សីជាបណ្តោះអាសន្ន រង់ចាំធ្វើការដោះស្រាយជាក្រោយ ៕

• ប្រុងប្រយ័ត្ន
• របួស