រាជធានីភ្នំពេញ៖ ស្របពេលអាកាសធាតុមានភ្លៀងធ្លាក់ជោគជាំជាប្រចាំថ្ងៃ បង្កអោយទឹកស្ទឹងព្រែកត្នោតហាក់មានសន្ទុះហក់ឡើងខ្ពស់ខុសប្រក្រតីជាងពេលធម្មតានោះ អាជ្ញាធរខណ្ឌដង្កោរ រាជធានីភ្នំពេញបានអំពាវនាវអោយពលរដ្ឋដែលរស់នៅតាមប្របមាត់ស្ទឹងខាងលើមេត្តាបង្កើនការប្រុងប្រយ័ត្នខ្ពស់ចំពោះបាតុភាពទឹកកជំនន់ដែលអាចកើតឡើងបានគ្រប់ពេល ។

មន្ត្រីអាជ្ញាធរអោយដឹងថា ទឹកស្ទឹងព្រែកត្នោតមានសន្ទុះកើតឡើងរហូតទៅដល់ កំពស់៧ម៉ែត្រ៣០ បើគិតត្រឹមវេលាព្រឹកថ្ងៃទី១០ ខែតុលា ឆ្នាំ២០១៦នេះ ក្រោមទ្វារទឹកទំនប់៧មករា ។បន្ថែមពីនោះអាជ្ញាធរបានបញ្ជាក់ថាសង្កាត់ចំនួនមួយចំនួនកំពុងប្រឈមនឹងបាតុភាពនេះជាខ្លាំងមានដូចជា : ក្រាំងពង្រ សាក់សំពៅ គងនយ ស្ពានថ្ម និងកន្លែងផ្សេងៗទៀត ។

លើសពីនោះពលរដ្ឋត្រូវបង្កើតការប្រុងប្រយ័ត្នអោយបានខ្ពស់បំផុតព្រោះបច្ចុប្បន្នភ្លៀងចេះតែធ្លាក់មកជោគជាំជារៀងរាល់ថ្ងៃ បង្កសន្ទុះទឹកក៏ចេះតែកើនឡើងជាលំដាប់ដូចគ្នា ។

គួរបញ្ជាក់បន្ថែមថា នៅវេលាព្រឹកថ្ងៃខែដដែលនេះ ក្រសួងធនធានទឹក និងឧតុនិយម បានចេញសេចប្រកាសមួយ អំពាវនាវដល់ពលរដ្ឋទូទាំងប្រទេសទាំងអស់ ត្រូវប្រុងប្រយ័ត្នចំពោះ អាកាសធាតុ រយះពេលពេញមួយសប្តាហ៍ ក្នុងសប្តាហ៍ទី២ នៃខែតុលានេះ ដោយមានភ្លៀងធ្លាក់ជោគជាំរាល់ថ្ងៃ និងរាយបាយពាសពេញរាជធានី ខេត្តទាំងអស់ក្នុងប្រទេស ពិសេសតំបន់ខ្ពង់រាប និងទំនាបកណ្តាល ៕ លីហេង          

• អាជ្ញាធរ
• ខណ្ឌដង្កោ
• ប្រុងប្រយ័ត្ន
• ស្ទឹងព្រែកត្នោត