រាជធានីភ្នំពេញ៖       ឯកឧត្តមកឹមស៊ីថនរដ្ឋមន្ត្រីស្តីទីក្រសួងពាណិជ្ជកម្មតំណាងដ៏ខ្ពង់ខ្ពស់របស់ ឯកឧត្តមស៊ុនចាន់ថុលទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្មនៅថ្ងៃទី២ខែមីនាឆ្នាំ២០១៦បានអនុញ្ញាតឲ្យគណៈប្រតិភូស្ថានទូតនៃព្រះរាជាណាចក្រហូឡង់ដែលដឹកនាំដោយ លោក Arie Veldhuizenអមដោយក្រុមស្រាវជ្រាវមកពីសកលវិទ្យាល័យ Wageningenនិងមជ្ឈមណ្ឌលសម្រាប់ជំរុញការនាំចេញពីប្រទេសកំពុងអភិវឌ្ឍន៍(CBI) ចូលជួបសម្តែងការគួរសម និងពិភាក្សាការងារ នៅទីស្តីការក្រសួងពាណិជ្ជកម្ម។

ឯកឧត្តមរដ្ឋមន្ត្រីស្តីទី បានសម្តែងការស្វាគមន៍ និងថ្លែងអំណរគុណដល់ លោក Arie Veldhuizen ដែលបានដឹកនាំសហការី មកទស្សនកិច្ចនៅក្រសួងពាណិជ្ជកម្ម។ឯកឧត្តមរដ្ឋលេខាធិការ បានជម្រាបជូនគណៈប្រតិភូ អំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការកែទម្រង់ និងសកម្មភាពថ្មីៗរបស់ក្រសួងពាណិជ្ជកម្ម ដើម្បីពង្រីកកិច្ចសហប្រតិបត្តិការពាណិជ្ជកម្ម និងការវិនិយោគ។

គណៈប្រតិភូបានជម្រាបជូន ឯកឧត្តមរដ្ឋលេខាធិការ អំពីគោលបំណងនៃជំនួបនេះ មានពីរគឺ (១) ដើម្បីស្វែងរកឱកាសក្នុងការវិនិយោគក្នុងវិស័យកសិកម្ម ដូចជា ផ្លែឈើ បន្លែ និងគ្រឿងទេសនៅកម្ពុជា។ (២) មជ្ឈមណ្ឌលសម្រាប់ជំរុញការនាំចេញពីប្រទេសកំពុងអភិវឌ្ឍន៍ (CBI) ដើម្បីស្វែងរកលទ្ធភាពក្នុងការរៀបចំកម្មវិធីគាំទ្រវិស័យឯកជន ដើម្បីនាំចេញផលិតផលទៅកាន់សហភាពអឺរ៉ុប។

ឯកឧត្តមរដ្ឋមន្ត្រីស្តីទី បានសម្តែងនូវការគាំទ្រចំពោះ គណៈប្រតិភូហូឡង់ សម្រាប់ការស្វែងរកការវិនិយោគលើវិស័យកសិកម្មនៅកម្ពុជា។ ទន្ទឹមនឹងនេះផងដែរ ឯកឧត្តមរដ្ឋមន្ត្រីស្តីទីបានជំរុញ និងលើកទឹកចិត្តឱ្យ ហូឡង់ ស្វែងយល់ពីលទ្ធភាពនៃការ វិនិយោគ លើរោងចក្រកែច្នៃផលិតផលសក្តានុពលនៅក្នុងប្រទេសកម្ពុជា។

• ប្រទេសហូឡង់
• កសិកម្ម